UZINDUZI NRA KATA YA MKONGORO

 

CHAMA cha National Reconstruction Alliance (NRA) kimezindua kampeni za uchaguzi mdogo wa udiwani katika kata ya Mkongoro Halmashauri ya wilaya kigoma huku mgombea wake Fadhili Kiswaga akiahidi kupigania kuboreshwa kwa mazao ya kahawa, nanasi na michikichi ili kuwafanya wakulima wa mazao hayo kuondokana na umasikini.

Akizungumza katika mkutano wa hadhara wa uzinduzi wa kampeni hizo uliofanyika kwenye kijiji cha Mkongoro, Mgombea huyo wa NRA alisema kuwa ni jambo la kusikitiisha kuona kijiji cha Mkongoro kikiwa na sifa kubwa ya kulima nanasi zinazipendwa huku wakulima wake wako na hali mbaya kwa umasikini.

Alisema kuwa hali hiyo ya wakulima wa mazao hayo inachangiwa kwa kiasi kikubwa na viongozi waliochaguliwa kushindwa kusimamia utekelezaji wa miradi ya kuwaondiolea umasikini wananchi na badala yake viongozi hao kujali maslahi yao.

“ndugu zangu sote tunajua kata ya Mkongoro inafahamika kwa kilimo cha mazao ya chikichi,kahawa na mananasi lakini wakulima wa mazao hayo ukiwaangalia wako hoi kwa umasikini, hakuna wa kuwatetea ili kuboreshewa kwa miundo mbinu ya masoko waweze kuuza mazao yao na kupata faida, Halmashauri inakusanya kodi kila siku lakini haijali kuweka mazingira mazuri kwa wakulima hao,”

Nichagueni niwe mtumishi wenu, nikopesheni kura name nitawalipa maendeleo, nitakuwa kiongozi ambayo atasimama badala ya watu siyo kama wale walioweka ubinfsi mbele na kunagalia maslahi yao, mmewatuma halmashauri wakafanyeni kazi lakini wao wanafanya kinyume chake,”alisisitiza Kiswaga.

Awali mwenyekiti wa chama cha NRA mkoa kigoma, alisema kuwa chama hicho Khalif Khalfani milembe alisema kuwa chama hicho kimemsimamisha Kiswaga kwenye uchaguzi huo kutokana na umahiri wake kiutendani wakiamini kuwa atakuwa msaada mkubwa kwa maendeleo ya wananchi wa kata ya Mkongoro.

Milembe alisema kuwa wananchi wa kata hiyo kutomchagua Kiswaga ni sawa na kuacha dhahabu izolewe na maji na ndiyo maana chama hicho pia kilimfanya kiongozi huyo kuwa Katibu Mwenezi wake wa Taifa kutokana na umahiri huo wa utendaji wake.

Akieleza kufanyika kwa uchaguzi huo, Mkurugenzi Mtendaji wa Halmashauri ya wilaya kigoma, Miriam Mbaga alisema kuwa uchaguzi huo unafanyika kufuatia kifo cha diwani wa kata hiyo, Sospeter Laurent na kwamba uchaguzi huo utafanyika Februal 9 mwaka huu.

Mbaga alisema kuwa tume ya uchaguzi ilizindua ratiba ya kampeni Januari 16 mwaka huu hadi Februari 8 ambapo jumla ya vyama saba vinatareajiwa kushiriki uchaguzi huo vikiwemo CCM, CHADEMA, CUF, NCCR – Mageuzi, NRA, NLD na DP.

  

makamu wa Raisi wa muungano wa vilabu vya waandishi wa habari nchini (UTPC), Jane Mihanji akisisitiza jambo katika mkutano mkuu wa mwaka wa Kigoma Press Club KGPC (kati kati) ni Mwenyekiti wa Kigoma Press Club, Deo Nsokolo

RC KIGOMA AONGOZA MAPOKEZI YA WAZIRI MKUU PINDA

 Waziri Mkuu Mizengo Pinda akiwapungia wananchi wa mkoa Kigoma waliofika kumpokea kwenye uwanja wa ndege wa Kigoma

Waziri Mkuu mizengo Pinda akipeana mkono na Naibu Waziri wa Nishati na Madini, George Simbachawene ambaye alikuwa miongoni mwa mawaziri walioshiriki ziara ya siku sita ya Waziri mkuu Mizengo Pinda mkoani Kigoma

 waziri Mkuu Mizengo Pinda akisalimia na mbunge wa jimbo la Kasulu Vijijini Agripina Buyogera muda mfupi baada ya waziri Mkuu kuwasili uwanja wa ndege wa kigoma kwa ziara ya kiserikali ya siku sita mkoani humo.

Karibu Kigoma ndiyo anavyoelekea kusema Mkuu wa mkoa Kigoma Kanali Mstaafu, Issa Machibya (kushoto) akimkaribisha Waziri Mkuu Mizengo Pinda aliyeanza ziara ya kiserikali ya siku sita mkoani Kigoma (Picha zote na Fadhili Abdallah)
 

RC KIGOMA AKIFUNGA MAFUNZO JKT

 MKUU wa mkoa Kigoma Issa Machibya (wa pili kushoto) akikabidhi cheti kwa mmoja wa vijana waliofanya vizuri katika mafunzi ya JKT kwa vijana wa kujitolea na wale wa mujibu wa sheria kwenye kambi ya JKT Bulombora mkoani Kigoma (kulia) ni Mkuu wa kambi hiyo Meja Mohamed Mketo

 

KUFUNGA MAFUNZO YA JKT

 

 baadhi ya vijana wanaomaliza mafunzo ya JKT katika kambi ya Bulombola mkoani Kigoma wakisikiliza hotuba kutoka kwa mkuu wa mkoa kigoma Issa Machibya.

Baadhi ya vijana wanaomaliza mafunzo katika kambi ya JKT Bulombora mkoani kigoma wakipiga kwata kwa kupita kwa mwendo wa haraka mbele ya mkuu wa mkoa kigoma na viongozi mbalimbali waliohudhuria sherehe za kufunga mafunzo hayo.

 

Na Fadhili Abdallah,kigoma

 

MKUU wa mkoa Kigoma Issa Machibya amewataka vijana wanaomaliza mafunzo katika kambi za jeshi la kujenga Taifa mkoani Kigoma kuepuka kujiingiza kwenye matumizi ya madawa ya kuelvya sambamba na kujiepusha kutumika kuwa wabebaji wa madawa hayo kwani kufanya hivyo kuna athari kubwa kwa maisha yao.

 

Akifunga mafunzo ya vijana wa kujitolea na wale wa mujibu wa sheria yanayojulikana kama Operesheni miaka 50 ya JKT katika kikosi cha 821  JKT Bulombora wilaya ya Uvinza mkoani Kigoma, Machibya amesema kuwa taifa linapoteza hazina ya vijana ambao wamekumbwa na wimbi la matumizi na usafirishaji wa madawa ya kulevya.

 

Machibya amesema kuwa vijana ambao wamejitumbukiza katika matumizi ya madawa ya kulevya wameshindwa kutoa mchango wao katika ujenzi wa taifa na kwamba wengi wao wanapoanza kutumia madawa hayo  hupoteza uwezo wa kufanya kazi lakini pia kupoteza uwezo wa kufikiri kwa ajili ya maisha yao.

 

 

Kwa upande wake Mkuu wa kikosi cha 821 JKT Bulombora,Meja Ibrahimu mketo amesema kuwa vijana 2078 walianza mafunzo hayo ambapo kati yao 150 wameshindwa kumaliza mafunzo kutokana na sababu mbalimbali ikiwemo wengi kudaiwa kuanza mafunzo wakiwa na mimba ambapo hata hivyo vijana hao pamoja na mafunzo wameweza kutoa mchango mkubwa kambini hapo ikiwemo shughuli za uzalishaji mali.

 

 

Awali katika risala yao vijana hao iliyosomwa na Maimuna Issa wameomba serikali kuongeza muda wa mafunzo kwa vijana wanaojiunga na mafunzo ya JKT kwa mujibu wa sheria kutoka  miezi mitatu ambayo imeanza sasa na kufikia miezi sita kuwezesha vijana hao kupata mafunzo mengi muhimu ambayo kwa wakati huu wameyakosa kutokana na muda mfupi waliotumia.

 

 

  jumla ya vijana 2078 wamemaliza mafunzo hayo ambapo kati yao vijana wa kujitolea walikuwa 787  na wale wa mujibu wa sheria walikuwa  1294.

 

 

Mwisho.

 

 

 

 

KANISA LA TAG KIGOMA LAWEKWA WAKFU

 

Askofu Mkuu wa kanisa la Tanzania Assemblies of God (TAG), Barnabas Mtokambali akizungumza wakati wa ufunguzi rasmi wa jengo la Kanisa la TAG Jimbo la Kigoma  

 Waumini wa kanisa la TAG jimbo la Kigoma wakiwa wameshika kuta za jengo la kanisa hilo ikiwa ishara ya kuliombea na kuliweka WAKFU.

MAASKOFU, wachungaji na viongozi mbalimbali wa makanisa mkoani Kigoma wakiwa wameshika kuta za kanisa la TAG jimbo la Kigoma wakiliombea na kuliwekea WAKFU kama ishara ya kulizindua rasmi jengo hilo.

 

 

Na Mwandishi wetu, Kigoma

 

ASKAFU Mkuu wa kanisa la Tanzania Assemblies of God (TAG), Barnabas Mtokambali amepiga marufuku viongozi na waumini wa kanisa hilo kutumia nyumba za ibada za kanisa hilo kuendeshea masuala ya kisiasa.

 

Mtokambali alisema hayo alipokuwa akitoa hotuba  wakati wa ufunguzi wa jengo jipya la kanisa la TAG jimbo la Kigoma ambapo askofu huyo alisema kuwa kama kiongozi mkuu wa TAG hatasita kumfukuza kiongozi au muumini yeyote ambaye atabainika kutumia majengo ya kanisa kuendesha shughuli za kisiasa.

 

Alisema kuwa kuingiza masuala ya kisiasa katika nyumba za ibada kumekuwa na athari kubwa katika uendeshaji wa kanisa na kwamba matukio yanayotokea maeneo mbalimbali nchini ikiwemo kulipuliwa kwa mabomu kwa waumini kanisani msingi wake  ni kuacha kuabudu na badala kuendesha siasa.

 

Aliwaasa vipongozi na wamumini wa kanisa hilo kwamba nyumba za ibada zinapaswa kuheshimiwa kama mahali pa takatifu na kudumishwa kama sehemu takatifu ambapo wenye kukata tama watakimbilia kuokolewa.

 

Mtokambali alisema kuwa katika siku za karibuni kumekuwa na matendo mbalimbali ya kisiasa na uvunjifu wa amani ambapo waumini wa nyumba za ibada wanaendeha maandamano na kubeba mabango katika kuwakataa viongozi wa madhehebu yao badala ya kutumia vikao vya kikatiba vya makanisa yao.

 

Alisema kuwa TAG imekuwa ikiwafukuza viongozi na waumini wake kutoka katika kanisa hilo kwa utovu wa nidhamu na kwenda kinyume na maadili ya kanisa kwa sababu suala hilo lilianza tangu kwa Mungu ambapo shetani alifukuzwa na Mungu baada ya kuasi.

 

Sambamba na hilo Askofu huyo ameonya kuwepo kwa vitendo vya ubaguzi, ukabila na unyanyapaa miongoni mwa waumini wa kanisa hilo na kwamba vitendo hivyo pia havitavumiliwa ndani ya kanisa na kuwataka maaskofu na wachungaji kusimamia wajibu wao katika kusimamia kanisa.

 

Awali akisoma risala kwa niaba ya Kanisa hilo mzee wa kanisa la TAG jimbo la Kigoma, Alembe Sadock amesema kuwa jumla ya shilingi milioni 94.7 zimetumika kwa ajili ya ujenzi wa kanisa hilo kutoka katika mkakati wa kukusanya kiasi cha shilingi milioni 95.3 na kwamba ili liweze kukamilika kabisa kiasi cha shilingi milioni 55 nyingine zinahitajika kuweza kumalizia ujenzi huo.

 

Alisema kuwa sababu ya kanisa kushindwa kukamilika kama ilivyokusudiwa awali ni pamoja na kupanda kwa gharama za vifaa na kupanda kwa gharama za usafirishaji wa vifaa vya ujenzi kutoka maeneo ya nje ya mkoa Dar es salaam.

 

Kwa upande wake Mchungaji Kiongozi wa kanisa la TAG jimbo la Kigoma, Omari Mlenda amesema kuwa hadi sasa kanisa hapo lilipofikia hakuna msaada wowote kutoka nje ya nchi ambao umetumika na kwamba sehemu kubwa ya fedha za ujenzi wa kanisa hilo zimetoka kwa wauimini wenyewe.

 

Kwa sasa mchungaji Mlenda amesema kuwa wauimini na wadau mbalimbali wa kanisa hilo wanahitaji kujitoa tena kuweza kupata kiasi cha shilingi milioni 55 ambazo zitatumika kumaliza sehemu ya paa ya kanisa hilo na maeneo machache yaliyobaki.

 

Mwisho.

 

WAKULIMA WA KAHAWA KIGOMA WAASWA KUTOKATA TAMAA

 Mwenyekiti wa chama kikuu cha wakulima wa tumbaku mkoa kigoma KANYOVU), Mathias Dangwa akizungumza katika mkutano mkuu wa chama hicho (kulia) ni Meneja mkuu wa KNYOVU, Jeremia Nkangaza.

Na Mwandishi Wetu, Kigoma

CHAMA  kikuu cha wakulima wa kahawa mkoa kigoma (KANYOVU)  kimewataka wakulima wa mkoa huo kutokata tamaa na kuanguka kwa bei katika soko la dunia badala yake kuhakikisha kwamba kahawa inayozalishwa inakuwa na ubora wa juu jambo ambalo ndiyo njia pekee ya kuwafanya kuwa na soko la uhakika.

Akizungumza katika mkutano Mkuu wa chama hicho kinachojumuisha vyama vya msingi 11 vya wakulima wa kahawa mkoani Kigoma Meneja wa Kanyovu Jeremia Nkangaza amesema kuwa kupanda na kushuka kwa bei kwenye soko la dunia ni jambo la kawaida na kwamba wakulima wategemee kitu kama hicho kutokea.

Wasi wasi wa kushuka bei kwa kahawa katika soko la dunia kunafuatia mkakati wa nchi ya Brazili ambayo ni mzalishaji mkubwa wa kahawa duniani kuongeza uzalishaji hali ambayo itaathiri bei katika nchi changa zinazozalisha kahawa.

Alisema kuwa katika kuhakikisha wanakabiliana na changamoto ya bei katika soko la dunia mkakati wa chama hicho ni kuhakikisha wanazalisha kwa ubora wa juu na kupata masoko ya moja kwa moja badala ya kuendelea kupambana katika minada.

Kwa upande wake Mwenyekiti wa Kanyovu, Mathias Dangwa amesema kuwa pamoja na changamoto ya masoko katika soko la dunia lakini pia amelalamikia kutokuwepo kwa wataalam wa kahawa kwa ajili ya kutoa maelekezo kwa wakulima katika kusimamia uzalishaji unaozingatia ubora.

Sambamba na suala la wataalam Dangwa amesema kuwa upatikanaji wa pembejeo na madawa nalo ni tatizo na hakuna maelekzo ya moja kwa moja ya kitaalam ya aina ya madawa ya kutumia na hali hiyo inafanya kila mmoja kutumia madawa ambayo anadhani anayamudu kulingana na bei.

Kaimu Afisa kilimo wa Halmashauri ya wilaya Kigoma, Siwajibu Selemani amekiri kuwepo kwa wataalam wachache wa kahawa katika halmashauri hiyo lakini mkakati wa serikali ni kuhakikisha wataalam wanapatikana na kuwafikia wakulima kwa wakati.

Mwisho.

WAJASILIAMALI WATAKIWA KUZINGATIA UBORA KATIKA USINDIKAJI BIDHAA

 Baadhi ya wajasiliamali wa mkoani Kigoma wakifuatilia mada zilizokuwa zikiwsilishwa na maafisa wa Shirika la viwango nchini kwa wajasiliamali hao kuhusu uzalishaji na usindikaji wa bidhaa unaozingatia viwango vya ubora vilivyowekwa.

 Mkurugenzi wa udhibiti ubora wa TBS, Tumaini Mtitu akisisitiza jambo wakati akitoa mada kwenye semina ya wajasiliamali wa mkoa Kigoma

(Picha na Mwandishi wa Habarileo Kigoma)

SHIRIKA la viwango nchini (TBS) limewataka wajasiliamali wadogo nchini kuzingatia ufungashaji bora wa bidhaa zao kwani ndiyo pekee inayoweza kuvutia wateja na kupata masoko ya uhakika kwa ajili ya bidhaa wanazozalisha.

Mkurugenzi wa udhibiti ubora wa TBS, Tumaini Mtitu amesema hayo kwenye mafunzo kwa wajasilimali wadogo wa mkoani kigoma kuhusu namna ya kuzingatia usindikaji na ufungashaji unaozingatia viwango vya kitaifa na kimataifa.

Mtitu amesema kuwa pamoja na kuzingatia ubora katika uzalishaji lakini ufungashaji bora wa bidhaa ni jambo muhimu katika kuvutia wateja bidhaa hiyo inapopelekwa sokoni.

“Wakati mwingine wateja wanaangalia namna bidhaa zilivyosindikwa kwa maana ya Fainal Product hata kama hajaona kama uzalishaji wa bidhaa husika imezingatia ubora, kuvutia mteja ni jambo muhimu sana katika kupata masoko ya bidhaa, na hiyo inatokana na ufungashaji unaozingatia viwango,”alisema Mtitu.

Akifungua mafunzo hayo ya siku mbili kwa niaba ya  Mkuu wa mkoa Kigoma Issa Machibya , Katibu Tawala msaidi huduma za mipango Geoges Busungu amewataka wajasiliamali wadogo kutumia elimu wanayopata katika kuboresha shughuli zao.

Busungu alisema kuwa wajasiliamali wadogo na wa kati ni muhimu sana katika ukuaji wa uchumi wa eneo husika lakini wajasiliamali wanapaswa kufanya shughuli zao kwa kufuata maelekezo ya wataalam wa biashara na hasa suala la uzalishaji linalozingatia ubora wa viwango na ufungashaji wa bidhaa.

Wakizungumza na gazeti hili baadhi ya washiriki wa mafunzo wamesema kuwa yamekuwa na manufaa makubwa kwao kwani yamewafumbua macho na kupata utaalam wa vitu vingi ambavyo hawakuwa wanavijua kabla mafunzo hayo.

Hamisi Nkurunzi mmoja wa washiriki wa mafunzo hayo alisema kuwa ni wazi siku mbili za mafunzo zimekuwa na manufaa makubwa kwao na zinaweza kubadili na kuboresha utendaji wa shughuli zao ikiwemo uzalishaji unaozingatia viwango na ufungashaji wake.

Mwisho.

KIGOMA YAONGOZWA KWA AJIRA MBAYA ZA WATOTO

Na Fadhili Abdallah,Kigoma

Imeelezwa kuwa mkoa Kigoma kwa umekuwa ni mkoa unaoongoza kwa watoto chini ya miaka 18 kutumikishwa katika kazi za ndani nje ya mkoa huo badala ya kuwa shuleni.

Mtaalam  elekezi uelimishaji jamii wa shirika la uokoaji la kimataifa (IRC), Meshack Petro alisema hayo wakati wa uzinduzi wa mradi wa kupambana na ajira mbaya ya watoto (WEKEZA) kwenye  mashamba ya tumbaku mkoani kigoma na mashamba ya mkonge mkoani Tanga.

Petro alisema kuwa katika utafiti walioufanya unaonyesha kuwa hivi sasa watu wengi wamekuwa wakiagiza watumishi wa ndani kutoka mkoani Kigoma na hivyo kufanya sehemu kubwa ya watoto wa mkoa huo ambao walipaswa kupata elimu kuokosa.

Ili kukabiliana na tatizo la ajira mbaya kwa watoto alisema kuwa shirika la IRC kupitia mradi wa WEKEZA inatarajia kuendesha mradi wa miaka minne wa kupambana na tatizo hilo unaotarajia kugharimu kiasi cha shilingi bilioni 16.3 kwa ufadhili wa idara ya kazi ya serikali ya Marekani.

Akizungumzia hali hiyo Mkurugenzi wa shirika la IRC, Elijah Okay alisema kuwa nia ya mradi huo ni kuhakikisha kwamba ajira ya watoto inatokomezwa kabisa mkoani Kigoma hadi ifikapo mwaka 2016.

Alisema kuwa katika kazi wanazofanyishwa imegundulika kuwa watoto hao wamekuwa wakifanyiwa unyanyasa mkubwa wa kimwili na kiakili lakini kubwa ambalo mradi huo unataka kufanya ni kuhakikisha watoto hao wanarudishwa shuleni na kupatiwa elimu katika watoto wengine sambamba na mahitaji ya kiuchumi kama kuwawezesha kumudu masomo yao.

Akizindua mradi huo kwa niaba ya Mkuu wa mkoa kigoma, Issa machibya Katibu Tawala Msaidizi huduma za uchumi, Michael Orrota alisema kuwa mkoa Kigoma unakabiliwa na tatizo la watoto wanaotumikishwa katika kazi mbalimbali ikiwemo mashamba ya tumbaku na kwenye uvuvi.

Orrota alisema kuwa kutekelezwa kwa mradi huo kutawezesha kutokomeza mradi huo na kuondoa kabisa tatizo la utumikishwaji wa watoto lakini pia utawezesha kuinua uchumi wa baadhi ya familia zenye kipato kidogo ili waweze kuwahudumia watoto wao kupata elimu.

Mwisho.

 

 Katibu Tawala Msaidizi huduma za uchumi Michael Orotta akikata utepe kuashiria uzinduliwa kwa mradi wa kupambana na ajira mbaya za watoto mkoani Kigoma (WEKEZA) anayehuhudia kushoto ni Naibu Meya wa manispaa ya Kigoma Ujiji Ruhonvya Rashidi 

(Picha na Fadhili Abdallah)