USIMAMIZI WA SHERIA KIKWAZO UTUNZAJI MAZINGIRA

Na Fadhili Abdallah,Kigoma

USIMAMIZI wa sheria za utunzaji na uhifadhi mazingira umekuwa ni changamoto kubwa katika kuufanya mradi wa maendeleo ya bonde la ziwa Tanganyika kupata mafanikio kwani kwa hali ya sasa mradi hauwezi kuchukua hatua kuhusiana na watu wanaoharibu mazingira.

Meneja wa Mradi huo, Hawa Mshamu alisema hayo katika ziara ya kutembelea baadhi ya maeneo ya utekelezaji wa mradi ziara inayotokana na mkutano wa siku moja wa wadau kupeana taarifa ya hali ya maendeleo ya mradi huo.

Alikuwa akijibu baadhi ya maswali ya wajumbe wa ziara hiyo waliotaka kujua uongozi wa mradi unachukua hatua gani kwa watu wanaokaidi kutekeleza vipengele vya utekelezaji wa mradi au wanaohareibu mazingira.

Mshamu alisema kuwa kazi kubwa ya mradi ni kutoa elimu kwa jamii ya nini kifanyike kwa manufaa ya siku za baadaye pamoja na kuendesha miradi mbalimbali ya utunzaji na uhifadhi mazingira ikiwemo upandaji miti na miradi ya kujiingizia kipato kwa jamii katika baadhi ya vijiji vya mradi huo.

Akizungumza katika mkutano huo wa siku moja mkurugenzi wa mazingira wa  mamlaka ya bonde la ziwa Tanganyika (LTA) Gabriel Hakizimana alisema kuwa yapo mafanikio ambayo yameptaikana tangu kuanza kwa mradi ingawa zipo changamoto ambazo bado zinatakiwa kufanyiwa kazi zaidi.

Hakizimana alisema kuwa kikubwa zaidi elimu na uhamasishaji jamii unatakiwa kufanywa kwa nguvu kubwa ili kuifanya jamii itambue umuhimu wa utunzaji na uhifadhi wa bonde la ziwa Tanganyika kwa kipindi kirefu kijacho na kwamba vyombo vya habari vinayo kazi kubwa katika kushiriki katika mkakati huo.

Mkurugenzi huyo alisema kuwa ziwa Tanganyika ni urithi wa dunia likiwa na zaidi ya aina 600 za viumbe ambapo kati yake 200 havipatikani mahali popote zaidi ya ndani ya ziwa hilo na kwamba  upo umuhimu mkubwa kwa jamii inayozunguka ziwa hilo na nchi ambazo ziwa hilo lipo kulitunza kwa hali na mali.

Akifungua mkutano huo Mkuu wilaya kigoma, Ramadhani Maneno alisema kuwa wananchi wanapaswa kulifanya suala la uhifadhi na utunzaji mazingira ya bonde la ziwa Tanganyika kuwa sehemu ya maisha yao kutokana na umuhimu wa ziwa hilo.

Maneno alisema kuwa pamoja na ufadhili wa wahisani wa nje lakini pia serikali itaweka mkakati wa kuhakikisha fedha za utunzaji na uhifadhi wa mazingira katika halmashauri zinapatikana sambamba na kuzisimamia kwa karibu sheria za utunzaji na uhifadhi huo wa mazingira.

Mwisho.